Ohayoda ana dəhşəti: Uşağın damarına nəcis yeridən qadın məhkəmə qarşısında

Ohayo ştatında 35 yaşlı bir qadın, xəstəxanada müalicə altında olan uşağının damar sisteminə nəcis yeritdiyini etiraf edib və məhkəmə qarşısına çıxarılıb.

Minval.info xəbər verir ki, fevralın 6-da xəstəxana işçiləri müşahidə kameralarında qadının şpris vasitəsilə uşağın venadaxili kateterinə naməlum maddə yeritdiyini görüblər. Daha sonra həmin maddənin nəcis olduğu müəyyənləşdirilib. Görüntülərdə qadının tualetdən içərisində nəcis olan stəkanla çıxdığı və onu şprisə çəkərək uşağın palatasına getdiyi əks olunub.

Hadisə barədə dərhal xəstəxana rəhbərliyinə məlumat verilib və qadın nəzarətə götürülüb. Lakin fevralın 8-də o, eyni hərəkəti yenidən təkrarlayıb. Bundan sonra uşağa təcili tibbi yardım göstərilib, qadın isə saxlanılaraq məhkəmə qarşısına çıxarılıb.