Mehdiabadda sahibkarlar işıqsız: Kabel niyə yanır?

Abşeron rayonunun Mehdiabad qəsəbəsində yerləşən Zəlimxan Yaqub küçəsində sahibkarlar elektrik enerjisinin tez-tez kəsilməsindən narazıdırlar. Bu küçədə aptek, market, dönərxana və restoranlar kimi müxtəlif obyektlər fəaliyyət göstərir. Sahibkarların bildirdiyinə görə, elektrik enerjisinin kəsilməsi onların iş fəaliyyətinə ciddi ziyan vurur və işığın bərpası bəzən 8 saatdan çox çəkir.

Minval.info xəbər verir ki, xüsusilə qida məhsulları satan obyektlərdə ət, yağ və digər malların xarab olması ciddi problem yaradır. Şikayətçi Elman Şirməmmədovun sözlərinə görə, problemin səbəbi kimi kabelin yanması göstərilir. Lakin o, bu halın mütəmadi xarakter daşımasından narazıdır. “Kabelin yanması nəticədir, bəs bunun səbəbi nədir? Hava istidir, problem ola bilər, amma bu, ayda bir-iki dəfə baş verə bilər. Yeddi dəfə kabel yanması isə çoxdur. Belə şey görülməyib”, – deyə sahibkar bildirib.