İstanbulda İŞİD əməliyyatı: Terrorçu zərərsizləşdirildi

İstanbulda terror aktı törətməyə hazırlaşdığı iddia edilən İŞİD üzvünə qarşı xüsusi əməliyyat həyata keçirilib. Türkiyənin Milli İstihbarat Təşkilatı (MİT) və İstanbul Təhlükəsizlik İdarəsinin birgə apardığı əməliyyat-axtarış tədbirləri nəticəsində İŞİD terror təşkilatı ilə əlaqəli olduğu və Türkiyə ərazisində terror aktı hazırladığı müəyyən edilən 21 yaşlı Berkan Ç.-nin yeri müəyyənləşdirilib.

Minval.info xəbər verir ki, şübhəli şəxsin saxlanılması məqsədilə İstanbulun Sultanbəyli rayonunda əməliyyat keçirilib. Valiliyin açıqlamasına görə, əməliyyat zamanı Berkan Ç. təhlükəsizlik qüvvələrinə silahlı müqavimət göstərərək atəş açıb. Cavab atəşi nəticəsində o, zərərsizləşdirilib.

Atışma zamanı hadisə yerində olan bir mülki şəxs də yaralanıb. Hadisə ilə bağlı araşdırma davam etdirilir.