Hörmüzdəki gərginlik: Neftin qiyməti niyə yüksəlir?

Hörmüz boğazında neft daşımalarına tətbiq olunan məhdudiyyətlər səbəbindən qlobal neft bazarında qiymət artımları müşahidə olunur. ABŞ Enerji İnformasiya Administrasiyası (EIA) bu vəziyyətin təsiri ilə neft qiymətləri proqnozunu yeniləyib.

Minval.info xəbər verir ki, EIA-nın yeni proqnozlarına əsasən, 2026-cı ildə “Brent” markalı neftin orta qiymətinin 86,81 dollar olacağı gözlənilir. Bu, əvvəlki proqnozdan daha yüksəkdir və 81,91 dollar olaraq təxmin edilmişdi. “WTI” markalı neftin orta qiyməti isə 76,26 dollardan 80,88 dollara yüksəlib.

EIA-nın hesabatına görə, Hörmüz boğazından daşınan xam neft və digər neft mayelərinin həcmi 2025-ci ilin son rübündə gündəlik 21,6 milyon barel olduğu halda, 2026-cı ilin ikinci rübündə bu rəqəm 4,9 milyon barelə enib. Bu vəziyyət qlobal neft ehtiyatlarının azalmasına səbəb olur və qiymətlərin yüksək qalmasına gətirib çıxarır.

ƏLAQƏLİ

Bunu da oxu

Siirtdə 6 yaşlı uşağın boğazından çıxan zəli ailəni şoka saldı

12.08.2026 - 14:46

Qurumun proqnozlarına görə, “Brent” neftinin qiyməti dördüncü rübdə orta hesabla 78 dollar, 2027-ci ildə isə 69 dollar olacaq. Eyni zamanda, qlobal neft tələbatının 2026-cı ildə gündəlik 102,7 milyon barel, 2027-ci ildə isə 105 milyon barel olacağı gözlənilir. ABŞ-də xam neft hasilatının isə 2026-cı ildə gündəlik orta hesabla 13,8 milyon barel, 2027-ci ildə 14,15 milyon barel təşkil edəcəyi proqnozlaşdırılır.