Bakıda evlər söküləndə sakinlərə neçə faiz artıq sahə verilə bilər
Azərbaycanda köhnə və qəzalı binaların sökülməsi, həmin ərazilərdə yeni yaşayış komplekslərinin inşası zamanı mənzil sahiblərinə veriləcək kompensasiya məsələsi aktuallığını qoruyur. Belə hallarda ev sahiblərinə ödəniləcək məbləğin müəyyənləşdirilməsi, mənzilin bazar dəyərinin nəzərə alınması və vətəndaşların hüquqlarının qorunması mühüm əhəmiyyət daşıyır.
Publika.az xəbər verir ki, əmlak məsələləri üzrə ekspert Firdovsi Xəlilov burada bir neçə metod olduğunu bildirib. Onun sözlərinə görə, ümumi praktikaya əsasən, inşaat şirkətləri sakinlərə sökülən mənzilin sahəsindən 20 faiz artıq sahəyə malik mənzil təklif edirlər. Məsələn, 60 kvadratmetrlik mənzil söküldükdə, sahibinə əvəzində yeni binadan 72 kvadratmetrlik mənzil təklif olunur. Eyni zamanda, tikinti müddətində mənzil sahibinin kirayə xərcləri də qarşılanır.
Kompensasiya və hüquqların tənzimlənməsi
Bəzi hallarda məsələ pul kompensasiyası ilə həll edilə bilər. Belə olduqda ətraf ərazilərdəki mənzillərin qiymətləri əsas götürülür və kompensasiya kvadratmetrə uyğun hesablanır. Lakin burada mənzilin sahəsi kiçik olduqda, xüsusilə də şəhər mərkəzində yerləşdikdə, ödənilən kompensasiya ilə eyni ərazidə yeni mənzil almaq çətinləşə bilər. Bu isə ev sahibinin əvvəlki yaşayış yerindən köçməsinə səbəb ola bilər.
Paytaxtın “Papanin” adlanan ərazisində bir kvadratmetr üçün 2 700 manat kompensasiya nəzərdə tutulur. Özəl tikinti şirkətləri tərəfindən aparılan söküntülərdə isə sakinlərə sadəcə şirkətlə razılaşmaq təklif edilir. Nəticədə bəzi sakinlər həddindən artıq yüksək məbləğlər tələb edirlər ki, bu da tikinti şirkətlərinin xərclərini artırır.
Ekspertlər qeyd edir ki, qanunvericilikdəki boşluqların aradan qaldırılması və söküntü aparılacaq ərazilər üzrə şərtlərin əvvəlcədən müəyyənləşdirilməsi vacibdir. Bu, həm tikinti şirkətlərinin maliyyə imkanlarını əvvəlcədən hesablamağa, həm də sakinlərin hüquqlarının qorunmasına imkan verər.
Ən son xəbərləri bizim sosial media səhifələrimizdə izləyin!
Ölkədən və dünyadan ən sürətli canlı yayımları qaçırmamaq üçün bizə abunə olun:
OXŞAR XƏBƏRLƏR
66 il əvvəl hesablayıblar: dünyanın sonuna 1 ay qaldı?
Sevgi hormonu qorxuya qalib gəlməkdə rol oynayır
Türkiyənin müdafiə sənayesinin sürətli inkişafı İsraildə diqqət çəkir
Maya dişçilərinin qədim bacarıqları: Yad daşla bəzədilmiş diş
Avropanın ən yaşıl şəhəri haradadır? 2028 üçün səkkiz finalçı açıqlandı
