Bağdadda polis etirazçılara atəş açıb, ölənlər var

Bu gün Bağdadda keçirilən kütləvi etiraz aksiyası zamanı polis nümayişçilərə atəş açıb.

“Report” “Reuters”ə istinadən xəbər verir ki, paytaxtın Ər-Rəşidiyyə rayonunda təhlükəsizlik qüvvələrinin açdığı atəş nəticəsində azı 5 etirazçı ölüb.

Təhlükəsizlik və səhiyyə mənbələri isə 1 nəfərin öldüyünü, 22 nəfərin yaralandığını bildirib.

Qeyd edək ki, oktyabrın əvvəllərindən İraqın müxtəlif şəhərlərində keçirilən kütləvi nümayişlər zamanı təhlükəsizlik qüvvələrinin gördüyü sərt tədbirlər nəticəsində 250 nəfərdən çox etirazçı ölüb.