Azərbaycan xəzinə ödənişləri 2 saata endiriləcək

Azərbaycanda xəzinə ödənişlərinin icra müddətinin 2 saata endirilməsi nəzərdə tutulur. Bu barədə Publika.az-ın Report-a istinadən verdiyi məlumata görə, maliyyə naziri Sahil Babayev Bakıda keçirilən “Rəqəmsal Maliyyə Ekosistemi: İdarəetmədə Yeni Mərhələ” konfransında açıqlama verib.

Nazir bildirib ki, əvvəllər ödənişlərin həyata keçirilməsi üçün ən azı 5 iş günü tələb olunurdusa, hazırda bu müddət maksimum 10 saata endirilib. Gələcəkdə isə bu müddətin 2 saata qədər azaldılması planlaşdırılır.

Bu dəyişikliklər elektron müqavilə sistemi, yeni xəzinə modulu və elektron mühasibat sisteminin tam istifadəyə verilməsi ilə əlaqədardır. Bu sistemlər, dövlət satınalmaları üzrə müqavilənin imzalanmasından ödənişin həyata keçirilməsinə qədər olan bütün prosesləri əhatə edir. Həmçinin, dövlət aktivlərinin reyestrində uçotun aparılmasına və vahid məlumat bazasının formalaşdırılmasına xidmət edir.