Universitetlərdə bloger trendi: Alimlər kənarda qalır

Ali təhsil müəssisələrində son illərdə tələbələrlə keçirilən görüşlərdə tanınmış blogerlərin, müğənnilərin və sosial media fəallarının iştirakı artmaqdadır. Əvvəllər bu görüşlərdə əsasən şairlər, yazıçılar, alimlər və mühəndislər iştirak edirdi. Bu görüşlərin məqsədi tələbələrin dünyagörüşünü genişləndirmək və onların peşəkar inkişafına töhfə vermək idi.

Minval.info xəbər verir ki, bu ənənənin dəyişməsi və blogerlərin dəvət olunması sosial medianın gənclərin həyatında mühüm rol oynaması ilə əlaqədardır. Təhsil eksperti Ramin Nurəliyev bu tendensiyanın səbəblərini açıqlayaraq, sosial mediadakı tanınmışlığın artıq daha çox əhəmiyyət kəsb etdiyini vurğulayıb. Lakin o, məşhurluğun fəaliyyətin məzmunlu və faydalı olduğu anlamına gəlmədiyini qeyd edib.

Ekspertin fikrincə, universitet rəhbərlikləri də bu tendensiyanın formalaşmasında məsuliyyət daşıyır. Tələbələrin maraqlarını əsas götürərək hər tanınmış şəxsin dəvət olunması düzgün yanaşma deyil. Universitetlər tələbələrin ixtisasına və tədbirin mövzusuna uyğun peşəkar şəxsləri dəvət etməlidir. Blogerlərin iştirakı isə yalnız kommunikasiya, media və rəqəmsal texnologiyalar kimi sahələrdə faydalı ola bilər.