Polşa təhlükəsizliyini gücləndirir: Şərq sərhədində yeni müdafiə sistemi qurulur

Polşa, mümkün müharibə ssenarilərinə qarşı hazırlıqlarını artırır, lakin bu ssenarilərin reallaşmamasına ümid edir. Müdafiə nazirinin müavini Sezari Tomçik, bu barədə “Super Express” qəzetinə verdiyi müsahibədə açıqlama verib.

Minval.info xəbər verir ki, Tomçik, Polşanın hərbi hazırlıqlarının yalnız mətbuat konfransları üçün deyil, ən çətin şəraitdə milli müdafiə əməliyyatlarını həyata keçirmək üçün olduğunu vurğulayıb. O, enerji, infrastruktur və hərbi sahələrdə atılan addımların, potensial silahlı təcavüzə qarşı ölkənin təhlükəsizliyini təmin etməyə yönəldiyini bildirib.

Müdafiə nazirinin müavini, həmçinin Polşanın Rusiya və Belarusla sərhəddə müdafiə xətlərinin qurulmasını əhatə edən Şərq Qalxanı layihəsi çərçivəsində hərtərəfli pilotsuz təyyarələrdən müdafiə sistemi (SAN) üzərində işlədiyini qeyd edib. Onun sözlərinə görə, SAN sisteminin imkanlarının 80%-i müharibə dövrü üçün nəzərdə tutulub.