Fövqəladə hallara qarşı vahid rabitə sistemi yaradılır

Avropa Komissiyası fövqəladə hallar zamanı Avropa İttifaqı ölkələrinin xilasedici və digər xidmətləri arasında rabitəni təmin edəcək vahid, inteqrasiya olunmuş sistemin yaradılmasını təklif edib. Bu yeni platforma, Avropa Kritik Hallarda Rabitə Sistemi (EUCCS) adlanır və adi mobil rabitənin sıradan çıxdığı vəziyyətlərdə də fasiləsiz əlaqə yaratmağı hədəfləyir.

Minval.info xəbər verir ki, yeni sistem pilotsuz uçuş aparatlarının kritik infrastruktura zərbələri, terror hücumları, meşə yanğınları, daşqınlar və qasırğalar kimi fövqəladə vəziyyətlər zamanı istifadə üçün nəzərdə tutulub. EUCCS səs, mətn və video rabitəsini sürətli geolokasiya imkanları ilə birləşdirəcək və normal şəraitdə 5G texnologiyasından, mobil siqnal əlçatmaz olduqda isə peyk rabitəsindən istifadə ediləcək. Hər iki halda məlumatların şifrələnməsi nəzərdə tutulur.

Bu sistem üçün bütün xidmətlərin istifadə edə biləcəyi vahid cihazın tətbiqi planlaşdırılır. Xilasedicilər, yanğınsöndürənlər, polis, miqrasiya və digər xüsusi xidmətlərin bu sistemə qoşulması gözlənilir. Təklifin Avropa Parlamenti və Aİ Şurası tərəfindən təsdiqlənməsi tələb olunur və təsdiqlənəcəyi təqdirdə, sistemin 2030-cu ilə qədər tətbiqi planlaşdırılır.

ƏLAQƏLİ

Bunu da oxu

Rusiya Ukraynanın enerji infrastrukturuna ən böyük hücumunu həyata keçirdi

30.09.2026 - 18:42

Avropa İttifaqı ölkələri daha əvvəl də fövqəladə hallar zamanı rabitə problemləri ilə üzləşib. Məsələn, 2025-ci ildə İspaniya və Portuqaliyadakı meşə yanğınları, 2021-ci ildə isə Almaniya və Belçikadakı daşqınlar mobil rabitədə fasilələrə səbəb olub. Hazırda bəzi Aİ ölkələri xilasedicilər üçün öz rabitə sistemlərini inkişaf etdirir və bu yeni təşəbbüsün əsas məqsədi bu sistemləri vahid platformada birləşdirməkdir.

Qlobal təcrübələrdən nümunələr

ABŞ-da “FirstNet”, Böyük Britaniyada isə “ESN” kimi fövqəladə xidmətlər üçün xüsusi rabitə şəbəkələri fəaliyyət göstərir. Bu sistemlər fövqəladə hallarda əlaqə problemlərini minimuma endirmək üçün nəzərdə tutulub və Avropa Komissiyasının təklif etdiyi yeni sistem də oxşar məqsədləri daşıyır.