Valideynlərə məktəbli forması seçimi azadlığı verildi

Məktəbli formalarının alınması ilə bağlı valideynlər sərbəst seçim edə bilərlər. Valideynlərin müəyyən bir satış məntəqəsinə yönləndirilməsi yolverilməzdir.

Minval.info xəbər verir ki, bu barədə Məktəbəqədər və Ümumi Təhsil üzrə Dövlət Agentliyindən məlumat verilib. Valideynlər məktəbli formaları ilə bağlı məlumatı övladlarının təhsil aldığı məktəblərdən və ya yerli təhsili idarəetmə bölmələrindən əldə edə bilərlər.

Qeyd edək ki, Azərbaycan Respublikasının Nazirlər Kabinetinin 17 mart 2022-ci il tarixli qərarına əsasən, ümumi təhsil müəssisələrində 4 növ geyim formasından biri tətbiq edilir. 2022-ci ildə hər bir ümumi təhsil müəssisəsinin Pedaqoji Şurası bu barədə müvafiq qərar qəbul edib və vahid geyim forması ən azı 3 tədris ili ərzində dəyişilməz qalır.