Tahir Kərimli: “Əziz müxalifətçilər, eybi yox, məni söyün, amma ayılın!”

Deputat Tahir Kərimli Milli Məclisdəki çıxışında qarşıdan Dünya Azərbaycanlılarının Həmrəylik gününün gəldiyini xatırladıb. O bildirib ki, bu dəfə ilk dəfədir Həmrəylik gününün gerçək ab-havasına köklənib, bu da ölkə prezidentinin bir müddət əvvəl səsləndirdiyi fikirlər, səsləndirdiyi tarixi mövqeyi ilə əlaqədardır.

Minval.info xəbər verir ki, T.Kərimli Prezidentin Cənubda yaşayan soydaşlarımızın vəziyyəti, o cümlədən ana dilində təhsillə bağlı mövqeyinə istinad edib. “Bu gün dünya azərbaycanlılarının İlham Əliyevə böyük ehtiyacı var. Hələ bizim qarşımızda böyük vəzifələr var”-deyən T.Kərimli əlavə edib ki, bizim böyük Azərbaycanın qurtuluşu Qarabağdan başlayır, artıq Qarabağ azaddır, amma Xankəndiyə qayıdış məsələsinin həlli üçün çalışmalıyıq.

Deputat Azərbaycan liderinin ətrafında birləşməyə çağırıb: “Bu gün inhisarçılığa qarşı mübarizəni kim bacara, xaricdəki qüvvələri kim neytrallaşdıra bilər? Son 200 ildə ilk dəfədir böyük tarix yazılıb. Əziz qardaşlar, əziz müxalifətçilər, eybi yox, məni söyün, amma ayılın! Xankəndi məsələsi həllini tapmalıdır. Dünya azərbaycanlıların lideri kimi İlham Əliyevin ətrafında birləşək!”