“Görürüsünüz, bu nankor ermənilərin top atəşinə tutmasına baxmayaraq, bu camaat işləyir. 15 gün gecikmə ilə olsa da, şəkər çuğundurunu yığacağıq. Gördüyünüz bu sahənin yuxarı tərəfinə də, aşağı hissəsinə də mərmi düşüb. Yenə də bizi o raketlər, o mərmilər qorxutmur” – Tərtər rayonuna sığınan Yusif Camalov belə deyir.

1994-cü ilin aprelində, Suqovuşan işğal olunan ərəfədə Tərtər rayonuna sığınan Yusif Camalov bu illər ərzində bir an olsa belə dədə-baba torpaqlarına qayıdacağına şübhə etməyib. Deyir ki, bu güvən ötən illər ərzində onu və onun kimi yüzlərlə soydaşımızı ayaqda saxlayıb, gələcəyə inamlı edib.

Nəhayət, 2020-ci ilin 3 oktyabr tarixi Suqovuşanın işğalçılardan təmizlənməsi günü kimi tarixə yazılıb. Yusif Camalov deyir ki, illərlə Tərtər rayonunda əkin-biçinlə məşğul olub, 2021-ci iliin yaz əkininə Suqovuşanda başlayacağından böyük sevinclə danışır.