Sovet “nostalgiyası” niyə hələ də qalmaqdadır?

Sovet İttifaqının dağılmasından 35 il keçməsinə baxmayaraq, onun təsiri altında olan müstəqil dövlətlərdə sovet nostalgiyası hələ də mövcuddur. Bu nostalji, xüsusilə sosial təminat və sabitliklə bağlı müsbət fikirlərlə yadda qalan sovet dövrünün üstünlükləri kimi qəbul edilir.

Minval.info xəbər verir ki, bəzi ölkələrdə, xüsusilə Baltikyanı respublikalarda və Ukraynada sovet nostalgiyası artıq arxa plana keçsə də, Belarus kimi ölkələrdə bu tendensiya hələ də güclüdür. Azərbaycanda isə vəziyyət fərqlidir. Burada sovet dövründən qalan nostalji hissləri cəmiyyətin müxtəlif yaş qruplarında fərqli şəkildə özünü göstərir.

Hüquqşünas Qulamhüseyn Əlibəyli bildirir ki, gənclər və orta nəsil arasında sovet nostalgiyası demək olar ki, yoxdur. Onlar ya sovet dövrünün sonlarında yaşayıblar, ya da müstəqillik dövründə doğulublar. Lakin yaşlı nəsil arasında müəyyən dərəcədə nostalji hissləri qalmaqdadır. Bu, əsasən yerli icra hakimiyyəti orqanlarında və polisdə baş verən özbaşınalıqlar, sosial-iqtisadi çətinliklər səbəbindən keçmişlə bağlı nostalji hisslərinin qorunub saxlanması ilə əlaqədardır.

ƏLAQƏLİ

Bunu da oxu

Bakıda mənzillərin qiyməti nə üçün durmadan BAHALAŞIR? - SƏBƏB

02.09.2026 - 15:40

Ekspertin fikrincə, Azərbaycanın müstəqilliyinin ilk illərində üzləşdiyi ağır sosial-iqtisadi vəziyyət də bu nostaljinin yaranmasında mühüm rol oynayıb. O dövrdə yaranan sosial problemlər bəzi insanlarda müstəqilliyin sosial problemlərlə müşayiət olunduğu fikrini formalaşdırıb. Qulamhüseyn Əlibəyli qeyd edir ki, keçmiş dövrlə indiki dövrü müqayisə edən insanlar daha çox dövlət qurumlarının fəaliyyətinə və vətəndaş müraciətlərinə diqqət yetirirlər.

Hüquqşünas hesab edir ki, zaman keçdikcə sovet nostalgiyası təbii şəkildə zəifləyəcək. Çünki o dövrü görən insanların sayı azalır və zamanla insanların, xüsusilə yaşlı nəslin şüurunda dəyişikliklər baş verir. Nəticədə köhnə dövrlə bağlı nostalji hissləri tədricən yox olur.