Sabunçuda neft kəmərində oğurluq cəhdi və yanğın

Sabunçu rayonu Maştağa qəsəbəsində, Savalan yaşayış massivinin yaxınlığında yerləşən magistral yeraltı neft kəmərində sentyabrın 2-də gecə saatlarında yanğın baş verib. Hadisə zamanı kəmərə qanunsuz müdaxilə edərək oğurluğa cəhd göstərilib.

Minval.info xəbər verir ki, Daxili İşlər Nazirliyinin yaydığı məlumata əsasən, yanğın söndürüldükdən sonra ərazidə aparılan baxış zamanı neft kəmərinə qanunsuz müdaxilə məqsədilə əlavə avadanlıqların quraşdırıldığı aşkarlanıb. Polis əməkdaşlarının həyata keçirdikləri tədbirlər nəticəsində 31 yaşlı Kənan Əliyev və əvvəllər məhkum olunmuş 29 yaşlı Araz Yaqubov şübhəli şəxs qismində saxlanılıb.

Yanğının məhz bu şəxslərin neft kəmərinə qanunsuz müdaxiləsi nəticəsində baş verdiyi müəyyən edilib. Faktla bağlı araşdırma davam etdirilir.