Restoranda qardaşları bıçaqlayan şəxsə 4 il həbs

Bakıda iki qardaşı bıçaqlamaqda təqsirləndirilən Namiq Şirinlinin cinayət işi üzrə məhkəmə prosesi yekunlaşıb. Bakı Ağır Cinayətlər Məhkəməsində keçirilən iclasda 2001-ci il təvəllüdlü Namiq Şirinliyə hökm oxunub. Hadisə ötən il sentyabrın 25-də, gecə saat 02 radələrində Sabunçu rayonu, Kürdəxanı qəsəbəsində yerləşən “Okean” restoranında baş verib.

Minval.info xəbər verir ki, Namiq Şirinli restoranda müştəri qismində əyləşmiş Babək və Asəf Qazıyev qardaşlarına yaxınlaşaraq pul tələb edib. Onlar imtina etdikdə tərəflər arasında sözlü mübahisə yaranıb və mübahisə restoranın həyətində davam edib. Burada Namiq Şirinli xuliqanlıq niyyəti ilə cib bıçağı ilə qardaşlara zərbələr endirib.

Məhkəmə Namiq Şirinlini Cinayət Məcəlləsinin 126.1-ci (qəsdən sağlamlığa ağır zərər vurma) və 221.3-cü (silahdan və ya silah qismində istifadə olunan əşyalardan istifadə edilməklə törədilən xuliqanlıq) maddələri ilə təqsirli bilib və ona 4 il həbs cəzası verilib.