Paşinyan TRIPP layihəsinin marşrutunu açıqladı

Ermənistanın baş naziri Nikol Paşinyan Beynəlxalq Sülh və Rifah naminə Tramp Marşrutu (TRIPP layihəsi) çərçivəsində nəzərdə tutulan dəmir yolunun marşrutunu açıqlayıb. O, bu barədə Ermənistan parlamentində hökumətin 2026-2031-ci illər üzrə proqramını təqdim edərkən məlumat verib.

Minval.info xəbər verir ki, Paşinyanın açıqlamasına görə, dəmir yolu Ermənistanın cənubunda, sovet dövründə mövcud olmuş xətt üzrə, Nrnadzor-Aqarak istiqamətində, Araz çayının sahili boyunca uzanacaq. Bu marşrut Ermənistanı Azərbaycan ərazisi vasitəsilə Rusiya və Mərkəzi Asiya ölkələri ilə birləşdirəcək. Aqarakdan yük qatarlarının Naxçıvana hərəkəti də nəzərdə tutulur.

TRIPP layihəsi çərçivəsində Sünikdən keçən strateji tranzit marşrutunun yaradılması planlaşdırılır. Layihənin Ermənistanın yurisdiksiyası çərçivəsində fəaliyyət göstərəcəyi və ölkənin suverenliyinə toxunmayacağı bildirilib. Xatırladaq ki, TRIPP üzrə çərçivə sazişi 2026-cı ilin 26 may tarixində ABŞ və Ermənistan arasında İrəvanda paraflanıb və iyunun əvvəlində imzalanıb.