Maştağada qız qaçıran gənc qəza törətdi

Bakının Sabunçu rayonunun Maştağa qəsəbəsində qeyri-adi hadisə baş verib. Tavaylıq adlanan ərazidə 23 yaşlı Rüstəm Həbibov (ad-soyad şərtidir) idarə etdiyi “Khazar” markalı avtomobillə bir neçə maşına zərər verib. Hadisə zamanı polis əməkdaşları tərəfindən saxlanılan Rüstəmin bir neçə gün əvvəl tanış olduğu qızı qaçırdığı məlum olub.

Minval.info xəbər verir ki, qızın anası polisə müraciət edərək övladının tapılması üçün kömək istəyib. Eyni zamanda, qızın anasının rəfiqəsi də onların axtarışına qoşulub və barışıq üçün çalışıb. Rüstəm və qız görüş yerinə dəvət edilib, lakin Rüstəm orada polis maşınını görüb və avtomobilini sürətlə idarə edərək qaçmağa çalışıb. Bu zaman qəza baş verib.

Sabunçu Rayon Məhkəməsinin qərarı ilə Rüstəm Həbibov barəsində inzibati protokol tərtib edilib və o, 10 sutka müddətinə inzibati həbs cəzasına məhkum edilib.