Məhkəmə qərarlarını dəyişdirmək adıyla dələduzluq: 4 nəfərə hökm oxundu

Şəki Ağır Cinayətlər Məhkəməsində dələduzluq ittihamı ilə mühakimə olunan Rəsul Abbasov, Fəqan Həsənov, Zamin İbrahov və Bəhruz Hacıyevin cinayət işi üzrə məhkəmə prosesi başa çatıb. Hökmə əsasən, Rəsul Abbasov, Fəqan Həsənov və Zamin İbrahov 7 il, Bəhruz Hacıyev isə 5 il müddətinə azadlıqdan məhrum ediliblər.

Minval.info xəbər verir ki, təqsirləndirilən şəxslərə qarşı Cinayət Məcəlləsinin 178.3.2-ci maddəsi ilə ittiham irəli sürülüb. İttihama görə, onlar yüksək vəzifələrdə çalışan qohumlarının vasitəsilə vətəndaşlara məhkəmə qərarlarını dəyişdirmək vəd edərək, ümumilikdə 100 min manat dəyərində dələduzluq ediblər.

Zərərçəkmişlərdən yalnız birinə dəymiş ziyandan 6 min manat ödənilib, digər zərərçəkmişlərə isə hələ də ödəniş olunmayıb.