Kredit artımı: İstehlakçılar niyə borclanır?

Azərbaycanda banklardan götürülən kreditlərin həcmi sürətlə artmağa davam edir. Xüsusilə istehlak kreditlərində müşahidə olunan artım, əhalinin borclanmasının səbəbləri ilə bağlı suallar doğurur. Mərkəzi Bankın məlumatlarına əsasən, 2026-cı ilin iyul ayının sonunda ölkədə bankların kredit portfeli 32 milyard 95,3 milyon manat təşkil edib. Bu məbləğin 17 milyard 333 milyon manatı biznes, 10 milyard 36,8 milyon manatı istehlak, 4 milyard 725,5 milyon manatı isə ipoteka kreditlərinin payına düşür.

Minval.info xəbər verir ki, istehlak kreditlərinin həcmi bir il ərzində 11,5 faiz artaraq 10 milyard manatı ötüb. Bu artımın səbəbləri arasında insanların həyat standartlarının yüksəlməsi və yeni tələbatlarını qarşılamağa çalışmaları göstərilir. Vətəndaşlar arasında keçirilən sorğulara görə, kredit götürmək artıq zərurətə çevrilib. Bəzi vətəndaşlar kreditlərin həyat standartlarının yüksəlməsi ilə əlaqəli olduğunu, digərləri isə məcburiyyətdən irəli gəldiyini bildirir.

İqtisadçı Xalid Kərimli isə qeyd edir ki, əhalinin banklardan götürdüyü kreditlərin artması nə varlanmaya, nə də yoxsullaşmaya işarə edir. Onun fikrincə, bu göstərici əhalinin sosial vəziyyətini xarakterizə edən bir indikator deyil.