Keçmiş iş yerlərindən oğurluq edənlər: Marketdən zavoda uzanan cinayət izi

Paytaxtda keçmiş iş yerlərindən oğurluq edən şəxslər hüquq-mühafizə orqanları tərəfindən saxlanılıb.

Minval.info xəbər verir ki, Daxili İşlər Nazirliyinin məlumatına əsasən, Nizami rayonunda bir neçə oğurluq hadisəsi qeydə alınıb. Naməlum şəxslər rayon ərazisindəki marketlərdən birindən 6612 manat dəyərində elektrik naqili oğurlayıblar. Polis əməkdaşlarının keçirdikləri əməliyyat nəticəsində bu cinayəti törətməkdə şübhəli bilinən 47 yaşlı C.Hüseynzadə, 33 yaşlı E.Hüseynov və həmyaşıdı Ə.Məmmədov saxlanılıb. Araşdırmalar zamanı məlum olub ki, bu şəxslər əvvəllər həmin marketin anbarında çalışıblar və oğurladıqları naqilləri əlvan metal qəbulu məntəqələrinə satıblar.

Bundan əlavə, rayon ərazisində həyata keçirilən digər əməliyyat zamanı bir zavodun anbarından ümumi dəyəri 4250 manat olan müxtəlif avadanlıqları oğurlamaqda şübhəli bilinən 40 yaşlı Ə.Cavadov, 31 yaşlı O.Məmmədov və 62 yaşlı F.Musayev də saxlanılıb. Faktlarla bağlı araşdırmalar davam edir.