İrandan Azərbaycana narkotik keçirmək cəhdi ifşa edildi

Dövlət Sərhəd Xidmətinin (DSX) Sərhəd Qoşunlarının “Horadiz” sərhəd dəstəsinin xidməti ərazisində İrandan Azərbaycana külli miqdarda narkotik vasitənin qaçaqmalçılıq yolu ilə keçirilməsinin qarşısı alınıb. Ümumi çəkisi 55 kiloqram 105 qram olan narkotik vasitə və 1000 ədəd psixotrop tərkibli Metadon M-40 həbi ələ keçirilib.

Minval.info xəbər verir ki, DSX-nin Mətbuat Mərkəzinin yaydığı məlumata görə, keçirilmiş sərhəd axtarışı və əməliyyat tədbirləri nəticəsində avqustun 21-də 26 kiloqram 5 qram narkotik vasitəni və 1000 ədəd psixotrop tərkibli Metadon M-40 həbini ölkə ərazisinə keçirməyə cəhd göstərən bir nəfər, avqustun 22-də isə 29 kiloqram 100 qram narkotik vasitəni ölkə ərazisinə keçirməyə cəhd göstərən üç Azərbaycan vətəndaşı saxlanılıb.

Hər iki fakt üzrə əməliyyat-istintaq tədbirləri davam etdirilir.