Ev alışı üçün doğru zaman: Mütəxəssislərdən tövsiyələr

Əmlak bazarındakı mövcud vəziyyət və qiymət dəyişiklikləri ev almaq istəyənlər üçün düşündürücü məsələlərdən biridir. Mənzil alışı üçün doğru zamanın nə vaxt olduğunu müəyyənləşdirmək istəyənlər üçün bəzi tövsiyələr var.

Minval.info xəbər verir ki, Azərbaycan Qiymətləndiricilər Cəmiyyətinin sədri Vüqar Oruc, şəxsi istifadə üçün mənzil alışı zamanı bazarı təhlil edərək uyğun qərarlar qəbul etməyin mümkün olduğunu bildirib. Onun sözlərinə görə, noyabr və fevral ayları, bazarda aktivliyin nisbətən az olduğu dövrlərdir. Eyni zamanda, yay aylarında, xüsusilə avqusta qədər olan müddət də mənzil alışı üçün əlverişli ola bilər.

Vüqar Oruc əlavə edib ki, ümumilikdə qiymət artımı tendensiyası ilboyu davam edir. Buna görə də, bazarı 2-4 ay ərzində araşdıraraq, əldə olunan nəticələrə əsasən qərar vermək daha məqsədəuyğundur. Həmçinin, qiymətləndirici, rieltor və ya konsaltinq şirkətlərinə müraciət etmək də faydalı ola bilər. Bu, dünya praktikasında da geniş istifadə olunan bir yanaşmadır və peşəkar olmayan şəxslərin yanlış qərarlar verməsinin qarşısını alır.