Bakıda marşrutlar dəyişir: Sərnişinlər üçün yeni dayanacaq yerləri açılır

Bakı şəhərində bir sıra marşrutların dayanacaq yerləri yenidən təşkil edilib. Bu dəyişikliklər M1, M2 və M3 nömrəli ekspres marşrutların “28 May” Nəqliyyat Mübadilə Mərkəzində daha təhlükəsiz hərəkət etməsini təmin etmək və avtobus sıxlığını azaltmaq məqsədilə həyata keçirilib.

Minval.info xəbər verir ki, Azərbaycan Yerüstü Nəqliyyat Agentliyinin (AYNA) verdiyi məlumata görə, 2, 10, 20 və 88A nömrəli marşrutların aralıq dayanacaq məntəqələrinin yerləri dəyişdirilib.

“Dərnəgül” metro stansiyası istiqamətində Puşkin küçəsində, Muğan bağının qarşısında yeni dayanacaq yaradılıb. Bakı Beynəlxalq Avtovağzal Kompleksi istiqamətində isə Puşkin küçəsində, Səməd Vurğun bağının qarşısında dayanacaq nəzərdə tutulub. Bakı Ağ Şəhər və Qaraçuxur qəsəbəsi istiqamətində də dayanacaqlar Puşkin küçəsində, Muğan bağının qarşısında yerləşdirilib. “Azadlıq prospekti” metro stansiyası istiqamətində isə dayanacaq Puşkin küçəsində, Səməd Vurğun bağının qarşısında təşkil edilib.