Bakı-Vaşinqton münasibətlərində yeni mərhələ: Strateji tərəfdaşlıq müzakirə edildi

Azərbaycanın xarici işlər nazirinin müavini Elnur Məmmədovun Amerika Birləşmiş Ştatlarına səfəri çərçivəsində ABŞ dövlət katibinin Avropa və Avrasiya məsələləri üzrə köməkçisinin birinci müavini Endryu Stou ilə görüşü baş tutub.

Minval.info xəbər verir ki, Azərbaycan Xarici İşlər Nazirliyi görüşlə bağlı məlumat yayıb. Görüşdə Azərbaycan-ABŞ ikitərəfli münasibətlərinin cari vəziyyəti və gələcək inkişaf perspektivləri müzakirə edilib. Hər iki tərəf, iki ölkə arasında tərəfdaşlığın genişləndirilməsinin vacibliyini vurğulayıb.

Müzakirələr zamanı, xüsusilə, Azərbaycan Respublikası Hökuməti ilə Amerika Birləşmiş Ştatları Hökuməti arasında Strateji Tərəfdaşlıq Xartiyasının icrası və Bakı İqtisadi Dialoqunun nəticələri diqqət mərkəzində olub. Tərəflər, həmçinin, regional və beynəlxalq məsələlər ətrafında fikir mübadiləsi aparıb və sülh, təhlükəsizlik və rifahın təşviqinə yönəlmiş məsələlər üzrə sıx əməkdaşlığın davam etdirilməsinə hazır olduqlarını ifadə ediblər.