Bakı-Sumqayıt yolunda hava çirkliliyi artıb

Bakı şəhərində havanın ən çox çirkləndiyi ərazi müəyyən edilib. Bakı-Sumqayıt yolunda nəqliyyatın yüksək intensivliyi atmosfer havasının keyfiyyətinə təsir edən əsas amillərdən biri kimi qiymətləndirilir. Xüsusilə, səhər və axşam saatlarında bu yolda və Xırdalan istiqamətində avtomobillərin hərəkətinin artması və uzunmüddətli tıxacların yaranması müşahidə olunur.

Minval.info xəbər verir ki, mütəxəssislərin fikrincə, nəqliyyat vasitələrinin çox olduğu ərazilərdə avtomobillərdən atmosferə atılan emissiyaların təsiri lokal olaraq arta bilər. Benzin və dizellə işləyən mühərriklərdən müxtəlif çirkləndirici maddələr atmosferə daxil olur. Tıxac zamanı avtomobillərin mühərriklərinin uzun müddət işlək vəziyyətdə qalması isə atmosferə atılan emissiyaların artmasına səbəb ola bilər.

Bildirilib ki, nəqliyyatın intensiv olduğu ərazilərdə atmosfer havasının keyfiyyətinə müəyyən təsirlərin olması təbiidir. Xüsusilə, səhər və axşam saatlarında avtomobillərin daha çox hərəkət etdiyi və tıxacların yarandığı pik vaxtlarda nəqliyyat vasitələrindən atmosferə buraxılan emissiyaların təsiri lokal olaraq arta bilər. Bakı-Sumqayıt yolu, iri yol qovşaqları və avtomobil sıxlığının yüksək olduğu digər ərazilərdə də bu amilin nəzərə alınmasının vacib olduğu vurğulanıb.