Azərbaycanın ilk sərhədçi generalı Allahverdiyev vəfat etdi

Müstəqil Azərbaycan Respublikasının Sərhəd Qoşunlarının ilk komandanı və ilk sərhədçi generalı İsgəndər İmanverdi oğlu Allahverdiyev dünyasını dəyişib. O, 11 fevral 1947-ci ildə Bakı şəhərində anadan olub və Azərbaycan dövlət sərhədinin mühafizəsi sisteminin formalaşmasında mühüm rol oynayıb.

Minval.info xəbər verir ki, İsgəndər Allahverdiyev 1991–1992-ci illərdə Azərbaycan Respublikası Dövlət Sərhədini Mühafizə Komitəsinin sədri vəzifəsində çalışıb. 1992-ci ildə general-mayor rütbəsinə layiq görülərək, həmin ildən etibarən Azərbaycan Respublikası milli təhlükəsizlik nazirinin müavini və Azərbaycan Sərhəd Qoşunlarının ilk komandanı kimi fəaliyyət göstərib. O, 1992–1994-cü illərdə bu vəzifədə Azərbaycan sərhəd xidmətinin təşəkkülü prosesində iştirak edib.

General-mayor İsgəndər Allahverdiyevin vəfatı münasibətilə yaxınlarına, doğmalarına və hərbçi yoldaşlarına dərin hüznlə başsağlığı veririk. Allah rəhmət eləsin!