Azərbaycan səfirliyindən “The Guardian”a sərt cavab!

Azərbaycan səfirliyindən "The Guardian"a sərt cavab!

Azərbaycanın Böyük Britaniyadakı səfirliyi ‘The Guardian’ qəzetində dərc edilmiş qərəzli məqaləyə cavab verib. Səfirliyin müşaviri Günel Səlimova tərəfindən qəzetin redaksiyasına ünvanlanan məktubda, məqalənin müəllifinin fikirlərinin əksinə olaraq, müvafiq filmin şovinist mövqe ehtiva etdiyi və mövcud reallığı əks etdirmədiyi bildirilib.

Minval.info xəbər verir ki, məktubda keçmiş münaqişədən bəhs edilərkən, Azərbaycan xalqının yaşadığı faciələr, işğalın humanitar və sosial nəticələri, eləcə də davam edən mina təhlükəsinin nəzərə alınmasının vacibliyi vurğulanıb. Həmçinin, Ermənistanın Azərbaycan torpaqlarını işğal etməsi səbəbindən yaranan münaqişənin, Azərbaycanın 2020-ci ildə öz ərazi bütövlüyünü bərpa etməsi ilə nəticələndiyi qeyd olunub.

Məktubda, Azərbaycan və Ermənistan arasında davamlı sülh istiqamətində mühüm irəliləyişlərin əldə edildiyi, liderlərin son görüşlərində sülhün və normallaşmanın konkret nəticələrinin müzakirə edildiyi bildirilib. İki ölkə arasında ticarət əlaqələrinin bərpası, sərhədlərin delimitasiyası və regional bağlantı layihələrinin müzakirə olunması məsələləri də diqqətə çatdırılıb. Azərbaycan tərəfi, keçmiş münaqişənin yaratdığı bölünmələrə deyil, regionda sülh, əməkdaşlıq və qarşılıqlı etimadın möhkəmləndirilməsi istiqamətində əldə olunan müsbət nəticələrə yönəldilməsinin tərəfdarı olduğunu vurğulayıb.