Azərbaycanlı gənclər beynəlxalq sərgidə bürünc qazandı

Azərbaycanlı gənc ixtiraçılar, Leyla Əliyeva və Nərgiz Əliyeva, Çinin Quançjou şəhərində keçirilən 12-ci Beynəlxalq İxtiralar Sərgisində böyük uğur əldə ediblər. Onlar, 30-dan çox ölkənin iştirak etdiyi və 3700-dən artıq ixtira və innovativ layihənin təqdim edildiyi bu mötəbər tədbirdə, WAIR adlı layihələri ilə III yerin qalibi olaraq bürünc medala layiq görülüblər.

Minval.info xəbər verir ki, gənc ixtiraçılar həmçinin Çin İxtiraçılar Assosiasiyasının sertifikatı ilə təltif olunublar. Bundan əlavə, Leyla və Nərgiz Xorvatiya İxtiraçılar Birliyinin xüsusi ARCA Medal mükafatına da layiq görülüblər.

WAIR layihəsi atmosfer havasındakı nəmdən su əldə edilməsinə yönəlmiş innovativ bir təşəbbüsdür. Layihənin prototipi soyutma və kondensasiya prinsipi əsasında işləyir və su ehtiyatlarının məhdud olduğu ərazilərdə tətbiq oluna bilər. Layihənin mentorları Sevinc Əliyeva və Ömər Ələsgərovdur.