Ağdaşda qatar faciəsi: Müharibə iştirakçısı öldü

Ağdaş rayonunda baş verən faciəvi hadisə nəticəsində Vətən müharibəsi iştirakçısı həyatını itirib. Hadisə avqustun 29-da, saat 19:30 radələrində Qəbələ-Bakı marşrutu üzrə hərəkət edən sərnişin qatarının Ləki stansiyası yaxınlığında qeydə alınıb. Qatarın qarşısına qəfil çıxan 1995-ci il təvəllüdlü Kərimli Bədəl Məzahir oğlu aldığı ağır xəsarətlərdən hadisə yerində vəfat edib.

Minval.info xəbər verir ki, mərhum Bədəl Kərimli Vətən müharibəsində iştirak etmiş və “Xocavəndin azad olunmasına görə” və “Ağdamın azad olunmasına görə” medalları ilə təltif edilmişdi. O, ailənin tək övladı idi.

“Azərbaycan Dəmir Yolları” QSC-dən verilən məlumata görə, maşinist tərəfindən təcili tormozlama aparılsa da, məsafə az olduğundan toqquşma qaçılmaz olub. Qurum insanlara dəmir yolu xətlərini yalnız müəyyən edilmiş yerlərdən və piyada keçidlərindən keçməyə çağırır və qaydalara riayət etməyin vacibliyini vurğulayır.