Zaqatalada avtomobil ağaca çırpıldı, sürücü yandı

Zaqatalada baş verən ağır yol qəzası nəticəsində sürücü sükan arxasında yanaraq həyatını itirib. Hadisə gecə saat 02 radələrində Qax-Zaqatala avtomobil yolunun Zaqatalanın Yeni Suvagil kəndinə giriş hissəsində qeydə alınıb.

Minval.info xəbər verir ki, Əfqan Əfəndi oğlu Mülkümovun idarə etdiyi “VAZ 21099” markalı avtomobil idarəetməni itirərək yol kənarındakı ağaca çırpılıb. Qəza nəticəsində avtomobil yanmağa başlayıb və sürücü Ə. Mülkümov aldığı ağır xəsarətlər və yanğın səbəbindən hadisə yerində həyatını itirib.

Yanğın Zaqatala rayon Dövlət Yanğından Mühafizə Hissəsinin yanğınsöndürənləri tərəfindən söndürülüb. Ə. Mülkümovun cəsədi müayinə üçün Məhkəmə Tibbi Ekspertiza və Patoloji Anatomiya Birliyinin Zaqatala rayon şöbəsinə təhvil verilib. Hadisə ilə bağlı müvafiq qurumlar tərəfindən araşdırma aparılır.