Bu gün bir qrup media nümayəndəsinin Füzuli rayonunun işğaldan azad edilmiş ərazilərinə səfəri təşkil olunub. 

“Yeni Müsavat” Media Qrupunun əməkdaşları da media turda iştirak ediblər.

Səfər zamanı media nümayəndələrinə Zəfər yolunun tikintisi ilə bağlı görülən son işlər barədə məlumat verilib.

Azərbaycan Avtomobil Yolları Dövlət Agentliyinin Yerli və regional əhəmiyyətli şöbənin rəisi İlham Süleymanov jurnalistlərə açıqlamasında bildirib ki, artıq Zəfər yolunda işlərin 80 faizə yaxını başa çatmaq üzrədir.

Media nümayəndələri yolun 37-ci kilometrliyində inşa edilən iki körpünün inşaat işləri ilə də tanış olublar.

İlham Süleymanov deyib ki, yolun 51-ci kilometrliyində torpaq işləri tamamilə bitib və yol konstruksiyasının işlərinə başlanılıb.

“Zəfər yolunda 4 körpü var. Onlardan üçünün tikinti işlərinin 75 faizi artıq həyata keçirilib.

Hazırda dayandığımız körpünün altından Şuşaya ikinci yol çəkilməsi nəzərə tutulub”.

İ.Süleymanov qeyd edib ki, Zəfər yolunun əvvəlcədən elan edilən tarixdə- avqust ayında tamamlanması nəzərdə tutulub.

Xatırladaq ki, iyun ayının 15-də prezident İlham Əliyev Füzuli rayonuna səfər edərək yenidənqurma işləri ilə tanış olmuşdu.