Şəkidə itlər niderlandlı turisti ağır yaraladı

Şəki rayonunun Baş Zəyzid kəndində Niderland Krallığının vətəndaşı itlərin hücumuna məruz qalaraq ağır yaralanıb. Hadisə avqustun 29-da səhər saatlarında baş verib.

Minval.info xəbər verir ki, 1979-cu il təvəllüdlü Kramer Anne Hestler adlı turist avqustun 26-da Frankfurt-Bakı aviareysi ilə Azərbaycana gəlib və Şəki rayonunun dağlıq ərazisində piyada yürüşə çıxıb. Çələngi yaylağı istiqamətində hərəkət edərkən itlərin hücumuna məruz qalan turist müxtəlif dərəcəli bədən xəsarətləri alıb.

Ağır yaralı şəxsin təxliyəsi üçün Dövlət Sərhəd Xidmətinin Xüsusi Hava Əməliyyatları Qüvvələri Komandanlığının helikopteri ilə əraziyə tibb heyəti və xilasetmə qrupu göndərilib. Dəniz səviyyəsindən 2000 metr yüksəklikdə, çətin dağlıq relyefdə həyata keçirilən xilasetmə əməliyyatı nəticəsində yaralıya hadisə yerində ilkin tibbi yardım göstərilib və o, operativ şəkildə Şəki Rayon Mərkəzi Xəstəxanasına çatdırılaraq təcili əməliyyat olunub.