Pol Aron Bakıda azarkeşlərin səmimiliyindən təsirləndi

Estoniyalı avtoidmançı Pol Aron Bakı Şəhər Halqasına böyük qiymət verərək, şəhərin memarlığını və yerli mətbəxi xüsusilə vurğulayıb. Formula 1 həftəsonunda Bakıya gələn Aron şəhər, trek və azarkeşlər haqqında təəssüratlarını bölüşüb. Onun sözlərinə görə, Bakı Şəhər Halqası təqvimin ən maraqlı traslarından biridir.

Minval.info xəbər verir ki, Aron Bakı treki haqqında “Bu, yarış üçün ən yaxşı treklərdən biridir. Təqvimdəki ən uzun düzlüklərdən biri buradadır və bu, həmişə mübarizə üçün çoxlu imkan yaradır. Mən Bakı trasını ilk 10-luğa daxil edərdim – mənim qiymətim beş ulduzdur,” deyə bildirib.

Bakının memarlığı Pol Aron üçün xüsusi təəssürat yaradıb. O, şəhərin bej rəngli daş binalarını və müasir tikililərin harmoniyasını çox bəyəndiyini söyləyib. “Şəhərdə bu iki üslub bir-birinə yaxşı uyğunlaşır,” deyə o, əlavə edib.

ƏLAQƏLİ

Bunu da oxu

Formula 1 yarışları Malayziyaya qayıdır: Sepang trasında həyəcanlı anlar

02.10.2026 - 18:18

Aron yerli azarkeşlər haqqında da müsbət fikirlər səsləndirib. Onun sözlərinə görə, azarkeşlər çox səmimi və xüsusidir. “Hətta bir məqamda məni yaxından izləyirdilər – bu, başqa yarışlarda başıma gəlməmişdi,” deyə o vurğulayıb.

Azərbaycan mətbəxi də onun rəğbətini qazanıb. Pol Aron xüsusilə quzu ətini və yerli mətbəxin müxtəlif dadlarını qeyd edib. “Bakının enerjisi, insanların səmimiyyəti və müasirliklə tarixi bir araya gətirən ab-havası xoşuma gəldi,” deyə o bildirib.

Gələcəkdə Bakıya yenidən səfər etmək istədiyini bildirən Aron, şəhəri daha çox gəzmək və yerli yeməklərdən yenidən dadmaq arzusunda olduğunu deyib. Pol Aron kartinqdən başlayan karyerası ərzində gənc avtoidmançılar arasında diqqət çəkən pilotlardan biri olaraq tanınır.