Gədəbəydə qəzada yaralananların son durumu açıqlandı

Gədəbəy rayonunda baş verən yol-nəqliyyat hadisəsi nəticəsində xəsarət alan şəxslərin səhhəti ilə bağlı yeni məlumatlar açıqlanıb. Hadisə zamanı xəsarət alan beş kişi avqustun 28-də saat 20:20-də Gədəbəy Rayon Mərkəzi Xəstəxanasının Təcili tibbi yardım şöbəsinə yerləşdirilib.

Minval.info xəbər verir ki, müxtəlif dərəcəli bədən xəsarətləri alan şəxslərə xəstəxanada ilkin tibbi yardım göstərilib. Daha ixtisaslı müayinəyə ehtiyac yarandığından onlar Gəncə Şəhər Birləşmiş Xəstəxanasının nəzdində fəaliyyət göstərən Abbas Səhhət adına xəstəxanaya təxliyə ediliblər.

Tibbi Ərazi Bölmələrini İdarəetmə Birliyinin (TƏBİB) məlumatına görə, müalicə və müayinələrdən sonra dörd nəfərin vəziyyəti qənaətbəxş qiymətləndirilib və onlar ambulator müalicə üçün evə buraxılıblar. Hazırda yaralılardan birinin müalicəsi xəstəxananın müvafiq şöbəsində davam etdirilir və onun vəziyyəti orta ağır qiymətləndirilir.