Paşinyan erməni konyakının adını dəyişir

Ermənistan Baş naziri Nikol Paşinyan, ölkədə istehsal olunan konyakın adlandırılması ilə bağlı mühüm açıqlama verib. O, beynəlxalq standartlara əsaslanaraq, “konyak” adının yalnız Fransanın müəyyən regionunda istehsal olunan içkilərə aid olduğunu bildirib.

Minval.info xəbər verir ki, Paşinyan bu məsələni Ermənistan parlamentində hökumətin qarşıdakı beş il üçün proqramının müzakirəsi zamanı gündəmə gətirib. Baş nazir, Ermənistan istehsalı olan alkoqollu içkinin “konyak” adlandırılmasının yenidən nəzərdən keçirilməsinin vacibliyini vurğulayıb. O, ölkədə məhsulların keyfiyyətinə nəzarət üçün müasir laboratoriyaların yaradılmasının əhəmiyyətini qeyd edib.

Paşinyan, “konyak” adından imtina məsələsinin ölkədə ciddi müzakirələrə səbəb olduğunu da bildirib. O, müxalifət dairələrinin bu addımı milli sərvətdən imtina kimi qiymətləndirdiyini, lakin hökumətin bu istiqamətdə qanun layihəsi hazırlamağa hazır olduğunu ifadə edib.