Marko Rubio İran nümayəndə heyətinin ABŞ-dan çıxarılmasını tələb etdi

ABŞ Dövlət katibi Marko Rubio İranla sülh danışıqlarının tıxanmasından sonra bu ölkənin BMT Baş Assambleyasındakı nümayəndə heyətinin ABŞ-ı dərhal tərk etməsini tələb edib. Bu hadisə, iki ölkə arasında münasibətlərin gərginləşdiyinə işarə edir.

Minval.info xəbər verir ki, “Axios” portalının məlumatına görə, Ağ Ev əvvəlcə Tehranla danışıqlarda irəliləyiş olacağını gözləsə də, prosesin dalana dirəndiyi məlum olub. Nəticədə, Rubionun göstərişi ilə ABŞ-ın BMT-dəki Daimi Nümayəndəliyi İranın xarici işlər naziri Abbas Əraqçinin rəhbərlik etdiyi nümayəndə heyətinin Nyu-Yorku dərhal tərk etməli olduğunu bildirib. İranlı diplomatlar artıq sentyabrın 29-nun gecəsində Dohaya uçublar.

Nəşr qeyd edir ki, Qətər vasitəçilərinin ABŞ və İran arasında diplomatik irəliləyiş əldə etmək üçün göstərdikləri cəhdlər, tərəflərin güzəştə getmək istəməməsi səbəbindən nəticəsiz qalıb. Buna baxmayaraq, kompromis variantlarının müzakirəsi davam edir.