İran-Ermənistan arasında yeni gömrük dəhlizi açılır

İran və Ermənistan arasında sərhəddə yük daşımalarının daha sürətli həyata keçirilməsi məqsədilə ‘yaşıl’ gömrük dəhlizinin yaradılması barədə razılıq əldə olunub. Bu yeni mexanizm İranın Nurduz və Ermənistanın Aqarak gömrük məntəqələri arasında tətbiq ediləcək.

Minval.info xəbər verir ki, razılaşma İranın Culfa şəhərində İran Gömrük İdarəsinin rəisi Forud Əsgəri və Ermənistan Dövlət Gəlirləri Komitəsinin sədri Eduard Akobyan arasında keçirilən görüşdə imzalanıb. Tərəflər bu çərçivədə sadələşdirilmiş gömrük dəhlizinin yaradılmasını nəzərdə tutan protokola imza atıblar.

Yeni mexanizm çərçivəsində yük məlumatlarının sərhədə çatmazdan əvvəl elektron şəkildə mübadiləsi planlaşdırılır. Bu, gömrük rəsmiləşdirilməsinin sürətləndirilməsinə, kağız sənədlərdən rəqəmsal sənədlərə keçidə və yük maşınlarının sərhəddə gözləmə müddətinin azaldılmasına imkan verəcək.