Ermənistan deputatından sərt çıxış: “Tarixi ərazilər” məsələsində yanlış yanaşmalar!

Ermənistan deputatından sərt çıxış: "Tarixi ərazilər" məsələsində yanlış yanaşmalar!

Ermənistan parlamentinin “Vətəndaş Müqaviləsi” fraksiyasından olan deputat Arman Yeqoyan, tarixi ərazilərlə bağlı iddialara qarşı çıxıb. O, parlamentdəki çıxışında bu cür yanaşmanın doğru olmadığını vurğulayıb.

Minval.info xəbər verir ki, Yeqoyan, tarixi keçmişə və ya müəyyən dövrlərdə ermənilərin kompakt yaşadığı ərazilərə əsaslanaraq, bu yerləri “erməni vətəni” kimi təqdim etməyin yanlış olduğunu qeyd edib. “Cənab Karapetyan bu tribunada Adananın bizim vətənimiz olduğunu söylədi. Lakin hansı meyara əsaslanaraq? Adananın Kilikiyada yerləşdiyini bilirsinizmi? Biz vətənimizi hansı meyarla müəyyən edirik? Mənim babalarım Xoydan gəliblər. Siz dost ölkəmiz İranla görüşlərdə Xoyun bizim vətənimiz olduğunu deyəcəksinizmi?” deyə o sual edib.

Yeqoyan, Türkiyəyə qarşı ərazi iddialarına da toxunaraq, “Türklərə Adananın bizim vətənimiz olduğunu desəniz, onların nə düşünəcəyini bilirsinizmi? Tarix və tarixi vətən yalnız bizdə deyil. Ərəb xilafəti də burada olub. İndi hansısa ərəb dövləti gəlib desə ki, bura onların vətənidir, necə olacaq?” ifadələrini işlədib.