Taksi şirkəti tərəfindən aldadılan taksi sürücüləri aksiyaya davam edirlər.

Xəbər verdiyimiz kimi 200 nəfərə yaxın şəxs  “Taksi Park” adlı şirkət tərəfindən aldadılıb. Şirkət internet üzərindən elan yerləşdirərək taksi maşınlarının günlük ödənişlə icarəyə verildiyini bildirib.

Bu elanı görən onlarla şəxs şirkətə gəlib, tələb olunan sənədləri və pulu veriblər.

Aldadılan şəxslərdən biri Əli Mahmudov bu formada taksi icarəyə verən şirkətlər olduğu üçün “Taksi Park”ın da bu təcrübəyə əsaslandığını güman edib: “Taksi maşınlarını bu cür icarəyə götürmək mümkün olduğu üçün, düşündüm ki, bu da onlardan biridir. Mənə möhürsüz bir müqavilə imzalatdılar, üzərində sadəcə Əliyev İbrahim Hidayət oğlunun adı var. Mən də 600 manatı onlara verdim. Burada elə adam var ki, günlük ödənişi az olsun deyə, 5000 manat ödəyib. 1 həftə sonra da, “müqaviləni itirmişik, gəl yenisini bağla” dedilər. Fevralın 27-dən bəri hər dəfə maşının nə zaman veriləcəyini öyrənmək üçün zəng edəndə bir bəhanə gətirdilər. Gah dedilər, 8 martdır, gah da Novruz bayramıdır, proses uzanır. Axırı mənə bir tarix dedilər, o tarixdə maşın bazarına getdim, gördüm ki, nə gələn var, nə də gedən… Sonda 27 martda ofisə getdim ki, hər kəs ora toplaşıb, ofisi də daşımağa çalışırlar, artıq kameraları yığışdırıblar”.

Bazar ertəsi keçirilən aksiyadan sonra adıçəkilən şirkətin iki məsul şəxsi saxlanılmışdı. Hazırda aksiyanın davam etməsinə səbəb də, bu iki şəxsin azadlığa buraxılmasıdır.

Aldadılan şəxslər bildirirlər ki, onlara işin gedişatı ilə bağlı heç nə deyilmir: “Bizdən şikayət ərizəsi yazmağımızı tələb etdilər, daha sonra zəng edib bəzi şikayətçiləri yenidən çağırıblar. Dünən saxlanılmış şəxslərdən biri barədə xəbər almışıq ki, buraxılıblar. Şirkətin ofisində əyləşən iki xanım əməkdaş isə hələ də tapılmır. Biz o xanımlara zəng edə bilirik, amma necə olursa onlar polisə çağırılmayıblar. Əlimizdə səs yazıları, faktlar var”.

Şikayətçilərin sözlərinə görə, onların sənədlərini polis bölməsindən çıxarmağa belə cəhd ediblər: “Bir də gördük ki, bölmədən bir adam çıxdı, əlində şirkətdən götürülmüş notebook, sənədlər və s. Arxasınca düşdük. Sənədləri əlindən aldıq, kimliyini soruşduq heç nə demədi. Yaxasından tutub polis bölməsinə  tərəf apardıq, polislər də deyir ki, biz bu insanı tanımırıq. 28-ci polis bölməsindən Xəqani müəllim sənədləri ona gətirməsi üçün göndərib.  Halbuki, bu adam bizə kimliyini və səlahiyyətini təsdiq edən heç bir sənəd göstərə bilmədi. Bizim işimizlə bağlı sənədləri əlindən alıb polisə təhvil verdik. 27-ci polis bölməsinin 1-ci otağından, tədqiqatçının yanından sənədləri belə götürüblər.

Saxlanılıb daha sonra azadlığa buraxılan Elşən adlı şəxs də daha sonra gəldi və gördük ki bölmədən sənəd oğurlayanla göz qaş edir. Polis rəisi də, sənədləri oğurlayan adamı heç nə olmamış kimi sərbəst buraxdı.

Bu adam da seriya nömrəsinin sonu 300 olan “Porche” markalı maşına minib hadisə yerindən çox rahatca uzaqlaşdı. Bizim işimizin üstünü ört-basdır etməyə, faktları yığışdırmağa çalışdıqlarını düşünürük”.

Aksiya iştirakçıları məsələnin gündəmdə qalmasını istəyirlər: “Prezidentimizdən, yuxarı dairələrdən xahiş edirik, kömək etsinlər bizə, dərdimizə şərik olsunlar. Eləsi var ki, qızılını lombarda qoyub. İmkanı olan şəxs belə bir şirkətə heç müraciət edib, 500-600 manata maşın istəməz. Bura toplaşan hamı aşağı məvaciblə yaşayır. Bir cavab, bir hərəkət gözləyirik, bizə bir söz desinlər. Heç bilmirik, bizim işə kim baxır”.

Taksi sürücüləri onlara açıqlama verilmədiyi müddətcə aksiyaya davam etməkdə qərarlıdırlar.

Dəniz Kərimzadə

Minval.info