Şəkidə ödənişli körpü

Son vaxtlar bölgələrdə, xüsusən istirahət zonalarında ictimai əsaslarla qurulan, belə demək mümkünsə xalqın ümumi malı hesab edilən xidmət növlərindən istifadəyə görə kimlərinsə pul tələb etməsi hallarına rast gəlirik. Növbəti belə məqam Şəkidə üzə çıxıb – ödənişli avtomobil körpüsü.

Minval.İnfo ARB TV-yə istinadən xəbər verir ki, uzun illərdir mövcud olan körpünü bir sahibkar təmir edib və həmin şəxsin tapşırığı ilə körpüdən istifadəyə görə hər avtomobil 1 manat pul ödəməlidir.

Sahibkarın bu addımı qanuna uyğundurmu? Təmirə ehtiyacı olan hər hansı yolu iş adamı gəlir sahəsinə çevirə bilərmi? Əməkdaşlarımız məsələni araşdırıb.

Yerli turist: “Kişinin adını söylədilər, dedilər ki, giriş-çıxış ona çatır. Bilmədik nə məsələdir. Məəttəl qaldıq, pulunu verdik, keçdik”.

Nəzarətçi Anar Abdulhəmidov isə deyir ki, bu körpü şəxsi əmlak sayılır və onu öz hesabına təmir edən şəxsin qərarı ilə ödənişli edilib.

Anar Abdulhəmidov – Nəzarətçi: “Fiçəng müəllim dəfələrlə bu körpünü qurdu, düzəltdi ki, sakinlərə, qonaqlara xoş olsun, gəlsin istirahətini etsin. Öz hesabına qoyduğuna görə və heç bir qurum kömək etmədiyi üçün bunu pullu elədi”.
Nəzarətçi körpünün ödənişli olmasının bəzi sakinləri narazı saldığını etiraf edir. Vəziyyəti izah etdikdən onların bu halı normal qarşıladığını deyir. Ödənişli körpü yalnız gündüzlər faəliyyət göstərir, gecələrsə möhürlənir.

Anar Abdulhəmidov – Nəzarətçi: “Deyirlər ki, çaylaqda körpü pullu ola bilməz. Amma biz başa salırıq ki, buna görədir. Hamı normal qarşılayır”.

Qanunvericiliyə görə isə, ölkədə avtomobil yolları özəl ola bilər. Bunun üçün həmin yolun və ya yollar üzərində yerləşən körpülər və digər yol qurğularının layihə sənədlərinin hazırlanmasından başlayaraq, bütün işlər fiziki şəxs və ya şirkət tərəfindən görülür, həmçinin mülkiyyət hüququnun qeydə alınması həyata keçirilir. Ancaq bu hallarda da həmin yol ümümi istifadə üçün açıq olmalıdır.

Ərşad Hüseynov – Ekspert: “Dövlətin və ya bələdiyyənin yolu kiminsə tikməsindən, təmin olunmasından asılı olmayaraq, ümumi istifadə üçün açıq olmalıdır. Ödənişli olması üçün də Nazirlər Kabinetinin qərarı olmalıdır. Ödənişin məbləği ilə bağlı, həmin yolun ödənişli olması ilə bağlı, kimsə öz istəyinə görə, hətta yerli icra hakimiyyəti, yerli bələdiyyə, sahibkar yolun elementini pulludur deyə müəyyən edə bilməz. Bunu yanlız ali hakimiyyət orqanları edə bilər”.

Bu körpünün vəziyyəti isə heç də ürəkaçan deyil və heç bir normativə uyğun gəlmir. Dəfələrlə sel nəticəsində uçub. Bu isə təhlükəsizliyin necə təmin olunacağını sual altına qoyur.